కొత్త కోణంలో ‘కాలా’ సమీక్షలు!

సూపర్ స్టార్ రజనీ కాంత్ నటించిన కాలా సినిమాపై మొదట్లో వచ్చిన దానికి భిన్నమైన సమీక్షలు ఇప్పుడొస్తున్నాయి. సామాజిక కోణంలో వెలువడుతున్న సమీక్షలు…ప్రేక్షకులను థియాటర్ల బాట పట్టించేలా ఉన్నాయి. ఆలోచింపజేసేలా ఉన్నాయి. అలాంటి సమీక్ష ఒకటి మీరూ చదవండి.

*””’*””’*””’*””*””’*””’*””’*””*””*

దశాబ్దాలుగా ఒకానొక కుల సంస్కృతి, భాష, కట్టుబాట్లే తెలుగు సినిమా నిండా ఆక్రమించాయి. యిటీవల మళ్ళీ ఆ కులానికి పోటీగా యితర కులాల సంస్కృతి చిన్నగా సినిమాలలో చొప్పిస్తున్నా మొత్తానికి సారాంశం ఒక్కటే! ఆధిపత్య సంస్కృతి, భాష, ఆయా కులాల గొప్పదనం, యదాతధవాదం తప్ప ద్రుక్పధాలలో మార్పేమీ లేదు. వారి సినిమాలలో స్త్రీ పాత్రలకైతే పూచికపుల్లకున్న విలువ వుండదు. స్త్రీ పాత్రలు కూడా తమ కుల ప్రయోజనాలతో పాటు పురుష ప్రయోజనాలనే కాపాడుతుంటాయి. యే కుల కాంతలు యే ధర్మం నెరవేర్చాలో వారే చెబుతుంటారు అమాయకంగా… అందంగా
పా.రంజిత్ అసలు సినిమాకు ‘కాలా’ అనే పేరు పెట్టడం దగ్గర నుంచి ఈ సినిమాలోని అన్ని సన్నివేశాల్లో దళిత గ్రామర్ ని ప్రవేశ పెట్టాడు. ఈ సినిమా మనువాద మూస భావాలను కాలితో తన్నడమే కాదు సమకాలీన రాజకీయ పరిస్థితిపైన అంబేడ్కరైట్ చూపుని కళ్ళారా చూపించింది. నలుపు, బులుగు రంగుల్ని సెల్యూలాయిడ్ పైన అద్దిన సినిమా ‘కాలా’. ఈ సినిమాకు దర్శకుడి దృక్పధమే హీరో అని చెప్పాలి. ‘నేల నీకు అధికారం, నేల మాకు జీవితం’ అనే రజనీ డైలాగ్ తో నేలతో ముడిపడి వున్న అధికార సంబంధాలను సూటిగా తేల్చి చెప్పాడు. దేశభక్తి పేరున తెల్ల తెల్లగా జరుగుతున్న సమస్త దుర్మార్గంపై పెద్ద డబ్బాడు నల్ల రంగును పోశాడు రంజిత్. ‘నలుపు శ్రమ జీవుల వర్ణం…మా వాడకొచ్చి చూడు, మురికంతా ఇంద్రధనస్సు లా కనిపిస్తుంది’ అంటూ అసలైన దళిత సౌందర్యాన్ని ‘కాలా’ గట్టిగానే ప్రదర్శించాడు. బొంబాయి మురికివాడ ‘దారావి’ లో దళిత శ్రమ జీవుల వునికిని కాపాడే ప్రయత్నంలో దళితుడు వీరయ్య పెత్తందారుల చేతిలో హత్యకు గురౌతాడు. ఆ సాహసోపేతమైన వారసత్వాన్ని కొనసాగిస్తూ కుల, మత రాజకీయాలు సాగించే మనువాదులకు అడుగడుగునా కొరకరాని కొయ్యగా మారిన ‘కరికాల’ దళిత ధిక్కారానికి ప్రతీక. ఈ సినిమాలో రోహిత్ పోలికలున్న అబ్బాయి కధానాయకుడు రజనీ చిన్న కొడుకు లెనిన్ లో కనిపిస్తాడు. భారతి అనే అమ్మాయిది లెనిన్ ప్రేమికురాలిగా, ఉద్యమ సహచరిగా డైనమిక్ రోల్. ఆమె పోలీసులు తన పై బట్టలు తీసి అపహాస్యం చెయ్యబోతే మూస యువతి పాత్రలాగా ముడుచుకుపోయి ఏడుస్తూ కూర్చోకుండా తిరగబడి వారితో ప్రాణాలకు తెగించి పోరాడి చనిపోతుంది. ఈ అమ్మాయి పాత్రని బాబాసాహెబ్ పుట్టిపెరిగిన మహారాష్ట్ర నీలి డైనమైట్ గా సిసలైన దళిత దిక్కారిగా మలిచాడు రంజిత్. యితర స్త్రీ పాత్రలైన స్వర్ణ, జరీన స్వంత వ్యక్తిత్వంతో మెరుస్తూ కనిపిస్తాయి. స్వర్ణ ఆత్మగౌరవాన్ని చాటే సగటు దళిత గృహిణి అయితే, జరీనా రాజకీయ చైతన్యం కలిగి దళిత సమూహాల పట్ల ముస్లింలకు ఉండవలసిన సహానుభూతిని ప్రదర్శిస్తూ అన్ని విషయాలలో వారితో మమేకమయ్యే విద్యావంతురాలైన అర్బన్ ముస్లిం స్త్రీ పాత్ర… సింగిల్ మదర్. కాళ్ళు పట్టించుకుని తన అహాన్ని సంతృప్తి పరుచుకునే పెత్తందారీ వర్గపు ప్రతినిధియైన ప్రతినాయకుడికి ఎదుటివారికి షేక్ హాండ్ ఇవ్వడంలో వుండే సమానత్వ భావనేంటో అర్ధం చేయిస్తుంది.
‘కాలా’ సినిమా బాక్ గ్రౌండ్ మ్యూజిక్ శరీరం మీద వెంట్రుకలు నిక్కబొడుకునేలా ఒక గంభీరమైన ధ్వనితో సినిమా అయిపోయాక కూడా మనల్ని వెంటాడే మంటలా వుంది. కధానాయకుడు ‘కాలా’ టేబుల్ మీద ఆనంద్ నీలకంటన్ ‘అసురుడు’ నవల కనిపిచడం, చాలా సన్నివేశాల్లో బుద్ధుడు, ఫూలే, అంబేడ్కర్ ల చిత్రపటాలు గోడల మీద కనిపిచడం దర్శకుడు రంజిత్ ఆలోచనల వెనక ఎవరున్నారో పరోక్షంగా చెప్పినట్లయింది. ‘కాలా’ ని బైక్ మీద తీసుకెళ్ళే అబ్బాయి ‘ I am a patriot, I will clean the society’ అని రాసుకుని నాలుగు రోడ్ల కూడలిలో పెద్ద ఫ్లెక్సీ పెట్టుకున్న ప్రతినాయకుడి మొహాన పేడ ముద్ద విసరడం లో దర్శకుడు తానేమి చెప్పదల్చుకున్నాడో సింబాలిక్ గా చెప్పేశాడు. అసలు అందం అంటే నలుపుదే అని ఈ సినిమా పదే పదే చెబుతుంది. కధానాయకుడికి ఈ సినిమా మొత్తం మీద నలుపు, నీలం తప్ప వేరే రంగు బట్టలు పెద్దగా వెయ్యకపోవడంలో కూడా దర్శకుడి ఉద్దేశం కనిపిస్తుంది.
విజయవాడలో ఒక ప్రముఖ ఐనాక్స్ లో చూస్తే పిడికెడు మంది కూడా దియేటర్ లో లేరు. సినిమా అయిపోయాక ప్రేక్షకులు ఎవరై ఉంటారని మొహాలు చూస్తే వాళ్ళు కూడా జాగర్తగా రహస్యంగా మా ముఖాలు గమనిస్తున్నారు. బహుశా మా ఇద్దరిదీ వొకే భాష కావచ్చు.
మనవి కాని జీవితాలను పదే పదే చూస్తూ తెలుగు సినిమాలకు కమర్షియల్ హిట్లు యిచ్చే దళిత యువకులు, స్త్రీలు, వాడ వాడంతా తరలి వెళ్లి కేరింతలతో సినిమాను చూడాలి… వర్ణ అంధత్వంతో గుడ్డిదైన సమాజాన్ని బోనులో నిలబెట్టిన ‘కాలా’ పా. రంజిత్ ను గుండెలకత్తుకోవాలి…

Be the first to comment

Leave a Reply

Your email address will not be published.


*